Rosemila Petit-Frère arete nan Repiblik Dominikèn

 Rosemila Petit-Frère arete nan Repiblik Dominikèn

Dimanch 10 out, nan Repiblik Dominikèn, yo arete ansyen majistra vil L’Arcahaie, Rosemila Petit-Frère. Otorite dominiken yo di yo te jwenn sou li anviwon yon milyon dola ameriken, e li pa kapab bay prèv sou orijin lajan sa a.

Aksyon sa a fè konnen ansyen gwo fonksyonè Leta a kounye a ap detni nan prizon, dapre sa redaksyon medya ayisyen FS NEWS HAÏTI konfime avèk yon sous ofisyèl nan gouvènman ayisyen an.

Ansyen majistra L’Arcahaie a, Rosemila Petit-Frère Saint-Vil, ki se tou responsab Radio Télé Monopole, te arete 10 out 2025 nan Puerto Plata. Li t ap sòti Kanada pou l antre Ayiti.

Otorite dominiken yo fè konnen yo te dekouvri prèske yon milyon dola ameriken nan afè pèsonèl li, san okenn eksplikasyon sou orijin lajan an. Apre plis pase twa èdtan entèwogatwa, yo te transfere l nan Santo Domingo pou pouswiv ankèt la.

Dapre kèk sous ki pre dosye a, otorite yo prevwa pou yo egzamine lyen finansye ak politik li yo. Anket la ta ka enplike kèk enstitisyon ayisyen tou, nan kad yon kolaborasyon jidisyè ant de peyi yo.

Pou kounye a, pa gen okenn akizasyon ofisyèl ki anonse, men dosye a deja soulve anpil reyaksyon ann Ayiti. Plizyè obsèvatè wè sa kòm yon lòt kou rèd sou imaj klas politik ayisyen an. Otorite dominiken yo pwomèt pou yo bay plis enfòmasyon nan jou kap vini yo.